കിടക്കാൻ നേരമായിട്ടും അനു മുറിയിൽ വരാത്തതുകൊണ്ടാണ് അന്വേഷിച്ചു ഇറങ്ങിയത്,

രചന – ജിഷ ലിജു

കിടക്കാൻ നേരമായിട്ടും അനു മുറിയിൽ വരാത്തതുകൊണ്ടാണ് അന്വേഷിച്ചു ഇറങ്ങിയത്, എല്ലാ മുറികളിലെയും വെളിച്ചം അണച്ചുവെങ്കിലും അടുക്കളയിൽ വെളിച്ചം കണ്ടപ്പോൾ മനസ്സിലായി ശ്രീമതിയുടെ ജോലി കഴിഞ്ഞിട്ടില്ലെന്ന്….. അടുക്കളയിൽ തിരിഞ്ഞു നിന്നു പാത്രം കഴുകികൊണ്ട് നിന്ന അവളെ എനിക്ക് അഭിമുഖമായി തിരിച്ചുനിർത്തി .കരഞ്ഞു കലങ്ങിയ കണ്ണുകളിൽ വീണ്ടും ഉരുണ്ടുകൂടി ജലകണങ്ങൾ…. എന്തു പറ്റി? ഒന്നുമില്ല..
ഞാൻ വഴക്കു പറഞ്ഞതിനാണോ !ഒന്നും മിണ്ടാതെ അവൾ കൈകഴുകി, അടുക്കളയിലെ കതകു തുറന്ന് പുറത്തെ ഇരുട്ടിലേക്ക് നോക്കി നിന്നു…. ഞാൻ പതുക്കെ അവളുടെ അടുത്തെത്തി അവൾക്കു അടുത്തായി അരഭിത്തിയിൽ ഇരുന്നു..

എന്റെ അനു നീ ഇങ്ങനെ വിഷമിക്കാതെ എന്റെ അപ്പോളത്തെ ദേഷ്യത്തിന് പറഞ്ഞു പോയതാ പൊന്നെ.. പിന്നെ കേറി വരുമ്പോൾ എന്താ താമസിച്ചെ? എവിടെ പോയതാ ഇതൊക്കെ തന്നെ അല്ലെ നിനക്ക് അറിയേണ്ടത്? അവളൊന്നും മിണ്ടാതെ എന്നെ നോക്കി നിന്നു…. പോട്ടെ സാരമില്ല, ഞാൻ അവളുടെ കണ്ണു തുടച്ചു കൊണ്ട് പറഞ്ഞു, ഇന്ന് ഞാൻ ഒരുപാട് ടെൻഷനിൽ ആയിരുന്നു കുറച്ചു പൈസ മറിക്കാൻ വേണമായിരുന്നു അതിന് വേണ്ടി നടക്കുവായിരുന്നു അതാ താമസിച്ചത്…. അവളുടെ മുഖത്തെ ഭാവം മാറി വരുന്നത് കൗതുകത്തോടെ ഞാൻ നോക്കിയിരുന്നു…
സങ്കടവും ദേഷ്യവും എല്ലാം മാറി, പകരം ആധിയായി… അതെയോ ഏട്ടാ, എന്നിട്ട് എന്നോട് എന്താ പറയാതിരുന്നെ?

സോറി ഏട്ടാ… എന്നിട്ട് രൂപ റെഡി ആയോ? എത്രയാ വേണ്ടത്? ഇല്ല അനു ശരിയായില്ല…. ഒരു രണ്ടുലക്ഷം രൂപയെങ്കിലും വേണമെടി… . അതു സാരമില്ല, ഞാൻ റെഡി ആക്കിക്കോളാം…നീ വേഗം വാ, മതി അടുക്കള പണിയൊക്കെ..മ്മ് മം.. ഞാൻ മുറിയിലോട്ട് പോയി, അവളോട്‌ അങ്ങനെ പറഞ്ഞെങ്കിലും മനസ്സ് നിറുകയായിരുന്നു….. നാളെ എങ്ങനെ ഒപ്പിക്കും? ചിന്തകൾ മനസ്സിനെ അലട്ടി അങ്ങനെ ഇരുന്നു… പുറകിൽ കൂടി വന്ന് അവൾ എന്റെ അടുത്തു ഇരുന്നപ്പോൾ ആണ് ഞാൻ ചിന്തയിൽ നിന്ന് ഉണർന്നത് , കൈയിൽ പിടിച്ചിരുന്ന അക്കൗണ്ട് ബുക്കും, രണ്ടു വളയും അവളെന്റെ കൈയിൽ കൊണ്ടു വച്ചു തന്നു…. ഏട്ടാ ഇതിൽ കുറച്ചു പൈസ ഉണ്ട്, സത്യത്തിൽ ഇത് ഏട്ടന്റെ തന്നെയാ ചിലവിനു തരുന്നത് മിച്ചം വെച്ച് ചിട്ടി പിടിച്ചതാ, ബാക്കി ഈ വള കൊണ്ടു പോയി പണയം വച്ചു എടുത്തോളു, ഏട്ടന്റെ കാര്യം നടക്കട്ടെ ബാക്കി യൊക്കെ പിന്നെ…. അവൾ എന്നെ നോക്കി ചിരിച്ചപ്പോൾ അവളോട്‌ ഞാൻ പറഞ്ഞു പോയി നീ മിടുക്കിയാടി അനു……അവളെ ചേർത്തു പിടിച്ചപ്പോൾ അഭിമാനം തോന്നി, എന്റെ പ്രശ്നങ്ങളിൽ ഞാൻ പോലും അറിയാതെ പലപ്പോളും എനിക്ക് താങ്ങായി നിൽക്കുന്ന അവളെ ഒന്നുടെ മുറുക്കെ പിടിച്ചു ………